[itzul] bost pertsonatik bat ala bost pertsonatatik bat?

[LARRINAGA LARRAZABAL, ASIER]

        Horrelako formuletan, "erreferentzia-multzoa" pluralean ere jar daiteke? Askotan izan dut zalantza, eta askotan pentsatu dut baietz.

        <<Ehunetarik bat>> esaten denean, ematen du "erreferentzia-multzoa" (ehun) pluralean deklinatuta dagoela. Orotarikoan hainbat adibide aurki daitezke:

- Ez da, bana bertze, ehunetarik bat, ez eta berrehunetarik bat, bere haurrei eskolan otoitzak eta katixima erakatsi nahi ez lioketenik. (Hiriart-Urruty)

        Hegoaldeko adibideetan -etatik ageri da, baina ez dit ematen mugagabe marka denik.

- Ez dira asko: ehunetatik bat gehienaz ere. (Mitxelena)

        Erreferentzia mila izanda, honelakoak dakartza OEHak.

- Miletarikan batek / etzuen sinisten. (Bordel)

        Gipuzkerako adibideetan <<milatatik>> dator, baina Gipuzkeraz -a amaierako hitzetan plurala -atatik atzizkiaren bidez egiten delakoa daukat.

- Ez naiz arritzen ni / onak ez irtetea / millatatikan bi. (Pascual de Iturriaga)

        Beste hainbat adibide, era askotakoak, Klasikoen Gordailutik jasoak.

- Hola, hamar lagunetarik zortzi etziren eroriko. (Jean Elizalde)

- Hari iharduki nahi balio, ez luke miletarik behin zer ihardets hari. (Duvoisin)

- Bolibi-ko gainzelaiaren milletatik bat ba-lu, bai erri xoragarria! (Orixe)

        Ez dakit adibideok asko frogatzen duten, baina zuzentzera etorri zaizkidan testuetan asko eta askotan aurkitu ditut antzekoak.

- Zazpi nesketatik bat 14 urte bete baino lehen geratzen da haurdun.

        Eta zalantza egin dut, esan bezala.


Asier Larrinaga