<div dir="ltr">IVAPek argitaratu berri duen "Itzulpen- eta berrikusketa-irizpideak. Erabakiak eta gomendioak" dokumentuan, ezin bipilago esaten da ezen, zentzu kataforikoa adierazteko, "erabat okerra" dela <i>honako (+ izena) + mugatzailea </i>egitura. Eskaintzen dituen adibide hauetakoa, alegia:<div><br></div><div><i>*</i><i>(...) Errege Dekretua, (...), <b><u>honako </u></b>errege-dekretu<b><u>a</u></b> aldatzen duena</i></div><div><i>*Gorte Nagusiek <b><u>honako </u></b>lege<b><u>a</u></b> onetsi dutela eta nik berretsi egiten dudala.<br></i></div><div><i><br></i></div><div>Halaber esaten da ezen, "honako" erabiliz gero, izenaren ondoren "hau/hauek" erakuslea behar dela nahitaez erabili. Alegia, goiko adibideetan "honako errege-dekretu hau" eta "honako lege hau" erabili beharko zirela.</div><div><br></div><div>Gaitzespen horrek txundituta utzi nau.</div><div><br></div><div>Batetik, ez dudalako ikusten gramatikako zer arrazoik debekatzen duen "honako" den izenlagun horrek zeri lagun egitea eta jarraian mugatzailearekin doan izen bati. Beraz, ez dirudi gaitzespenaren arrazoia gramatikala denik.</div><div><br></div><div>Bestetik, <i>honako+izena+mugatzailea </i>egituraren erabilera <i>honako+izena+erakuslea </i>egiturarena<i> </i>bezain ugaria ez izateak ez diolako ezer kentzen egituraren zuzentasunari. Bidenabar esanda: nahi duenak Googlen bilaketa egin dezake, esate baterako "honakoa"ri esan/erantzun/entzun/ikusi... aditzak gehituta (<i>honakoa esan</i>, <i>honakoa entzun</i>, eta abar) eta emaitza polit askoak aurki ditzake.</div><div><br></div><div>Eta Euskaltzaindiak? Zer dio "honako esaldia"ren tankerakoez?</div><div><br></div><div>Euskaltzaindiaren Hiztegian "honako" begiratuta, ikus zer dioen bigarren adieran: </div><div><br></div><blockquote style="margin:0px 0px 0px 40px;border:none;padding:0px"><div><span class="gmail-sense-n">2</span> <span class="gmail-defGrp"><span class="gmail-laburdura-pos" title="">adj.</span> <span class="gmail-def">Hau, hemengo hau. </span></span><span class="gmail-noteHB-outer">(<span class="gmail-noteHB">Dagokion izen sintagmaren ezkerrean ezartzen da, artikuluak edo erakusle batek, gehienetan <i>hau</i>-k, mugatzen duela sintagma</span>). </span></div></blockquote><div><br></div><div>Irakurri duzue, ezta? "<b><u>ARTIKULU </u></b>edo erakusle batek, <i>gehienetan hau</i>-k [azken zertzelada hori ez du inork zalantzan jartzen], mugatzen duela sintagma"</div><div><br></div><div>Halaber, bururatu zait Euskaltzaindiaren "Euskararen Gramatika"n "honakoa" edo "honako + izena + mugatzailea" zenbat aldiz agertzen den bilatzea. Erantzuna: bederatzi aldiz. Nork eta Euskaltzaindiak zertaz eta Euskararen Gramatikaz idatzitako obra goren horretan.</div><div><br></div><div>Hori guztia horrela, IVAPeko lan horren arduradunei jendaurrean egiten diedan galdera da: zertan oinarritu zarete aipatu egitura "erabat okerra" dela esateko?</div><div><br></div><div>Esker mila.</div></div>