[itzul] ER: Sepulvedaren testu bat

[Patxi Petrirena]

Luis Sepúlvedaren liburu hori euskarara itzuli berri samarra da, eta  
aipatutako pasartea eta hona aldatzea pentsatu dut (pixkatxo bat  
zabalago).


-Kaioa zara. Horretan txinpantzeak arrazoi du, baina ez beste ezertan.  
Denok maite zaitugu, Zorion. Eta maite zaitugu kaioa zarelako, kaio  
ederra. Katu zarela krazkatzen entzutean, ez zaitugu gezurtatu, zuk gu  
bezalakoa izan nahi izateak atsegin ematen digulako. Baina diferentea  
zara eta gogoko dugu zu diferentea izatea. Zure amari ezin izan genion  
lagundu, baina zuri bai. Arrautza-azaletik irten zinenetik babestu  
zaitugu. Gure maitasun guztia entregatu dizugu, zu katu egiterik behin  
ere pentsatu gabe. Kaio nahi zaitugu. Maite gaituzula ere nabaritzen  
dugu, adiskide gaituzula edota zure familia. Eta jakin ezazu goitik  
beheraino harrotzen gaituena zurekin ikasi genuela: diferentea  
estimatzen, errespetatzen, maitatzen ikasi genuen; zurekin. Oso erraza  
da gure berdinak onartzea eta maitatzea, baina diferentearekin horixe  
bera egitea oso zaila da, eta zuk lagundu zenigun egiteko horretan.  
Kaio bat zara eta kaioaren patua behar duzu jarraitu. Hegan egin  
beharra duzu. Lortzen duzunean, Zorion, zin egiten dizut zoriontsu  
izango zarela; eta orduan guk zuretzat eta zuk guretzat ditugun  
sentimenduak biziagoak eta ederragoak izango dira, zergatik?, eta  
diferenteen arteko maitasuna izango delako.

-Beldur diot hegan egiteari -krazka egin zuen Zorionek zutik jarriz.

-Hori gertatzen denean zurekin izango nauzu -miau egin zuen Zorbasek,  
burua miazten ziola-. Hala agindu zion zure amari.

Kaio gaztea eta katu handi, beltz eta gizena oinez abiatu ziren.  
Katuak samurki zion burua miazkatzen, eta kaioak bizkarra zion hegala  
zabalik estaltzen.


Luis Sepúlveda / Jesus Mari Mendizabal "Bizargorri": Kaio baten  
historia eta hegan egiten irakatsi zion katuarena. Alberdania, 2007  
(92.-93. or.)