[itzul] Koldo Izagirre eta “Sua nahi, Mr. Churchill?” Donostian, ekainaren 1ean

[Joserra_Beloki a bildua donostia.org]

  Oso  itzultzaileen  (bereziki,  literatur lanen itzultzaileen) intereseko
  lana  iruditzen  zait  “Sua  nahi,…?" hainbat motiborengatik: lehenik eta
  behin,  literatur  lan “puxka” delako, nire ustez; bigarrenik idazkeraren
  aberatsagatik  (hiztegiarena  ere  bai,  bistan da, baina ez hiztegiarena
  bakarrik);  eta  hirugarrenik,  besteak beste, hainbatek “egozten” dioten
  lan  zaila  izatearen (eta besteren batek, ñabardura eginda, aitortu dion
  “lan   exijente”   izatearen)  zeragatik;  Xabier  Mendigurenen  hitzekin
  esateko:  “Bada,  bai:  zaila  da, eta exijentea, eta ederra. Lanak hartu
  ditu   idazleak   nahi   zuen   huraxe  ahalik  eta  modurik  ederrenean,
  bihurrienean,   gaiztoenean   adierazteko,   eta  lanak  eskatzen  dizkio
  irakurleari,  idazleak sujeritutakoa jasotzen, erdizka esandakoa osatzen,
  metafora burtzoragarrietan esandakoa dezifratzen”.

  Egin  da,  dagoeneko,  hitzaldi  edo  solasaldiren  bat  edo  beste  “Sua
  nai,…?”ren  inguruan  (Larrabetzun,  Bilbon...,  esaterako),  eta  laster
  Donostian  ere  egingo  dugu,  Izagirre bertan dela; hor doa informazioa,
  nahiko lukeenaren jakingarri:

  DK-Literatura  egitasmoaren  barruan,  Koldo  Izagirreren  “Sua nahi, Mr.
  Churchill?”  izango  dugu  entzungai  eta solasgai. Izagirrek sarrera bat
  egingo  du,  mintzaldi  labur  bat, obraren zer-nolako batzuk, giltza edo
  klabe  batzuk,  emateko,  obra bere testuinguruan-edo kokatzeko; ondoren,
  solasaldi  irekia  (galderak, iritziak…). Solasaldia Donostian izango da,
  ekainaren 1ean, ostegunez, 19:30ean, Udal Liburutegiaren ekitaldi aretoan
  (San Jeronimo kalean); gonbidatuta zaudete.

  Bestalde, solasaldiaren motiboarekin, "Sua nahi, Mr. Churchill?" liburua
  dela-eta idatzi den hainbat literatur kritikaren laburpen edo "bilbatze"
  bat prestatu da. Testu luzea da (bi orrialde) eta ez dut hemen erantsiko.
  Interesa lukeenak www.sustatu.com/1147960236 helbidean topa lezake.
  Izagirrerekiko bi elkarrizketa interesgarri ere (besteak beste)
  www.berria.info/elkarrizketak eta Txorierriko Aikor aldizkariaren
  --http://www.aikor.com/aldizkariak/048/PDF/aikor48zbk.pdf— helbideetan
  (Miel A. Elustondok eta Gontzon Barandiaranek eginak, hurrenez hurren).

  Joserra Beloki