[itzul] Sartu-irteerak

Gotzon Egia gegia a bildua gipuzkoa.net
Ast, Maiatza 15, 10:49:37, CEST 2008


Zalantza bat sortu zait esaldi batean «sartu-irteerak» ikusi dudanean. 
Oso oker ez banago, dvandva erako elkartea da hori, «bata gehi bestea» 
esan nahi duena.

Erabideaz sortu zaizkit zalantzak: badirudi halako elkarteetan bi 
elementuak simetrikoak izan behar direla, kategoria eta erabide 
gramatikalari dagokionez. Adibide gehienak hala dira (Euskaltzaindiaren 
arauari lapurtuak): zeru-lurrak, galde-erantzunak, maisu-maistrak, 
izen-deiturak, txuri-urdin, gazi-geza, luze-zabal, argi-ilun; han-hemen, 
ezker-eskuin, harat-honat...

Alabaina, Euskaltzaindiaren adibideetan badira, baita ere, 
«laztan-musuka» edo «negar-zotinka»; horietan, simetria ez da 
erabatekoa, ez baita «laztanka-musuka» egiten. Badirudi halako 
[laztan-musu][ka] edo [negar-zotin][ka] egiten dela; hau da, bi elementu 
simetriko daude (laztan-musu), eta biei eransten zaie atzizki bat (ka).

Ez al daiteke [sartu-irte(n)][erak] era berdinean hartu? Nahitaez izan 
behar du, edo «sartu-irtenak», edo «sarrera-irteerak»?

Ereduzko Prosan ez da behin ere ageri «sartu-irteerak»; maiz, ordea, 
«sartu-irtenak». Googlen, «sarrera-irteerak» 650 bat dira, 
«sartu-irteerak» 120 bat, eta gehiago, 1150 inguru, «sartu-irtenak». 
Xuxenek gorritu egiten ditu «sartu-irteerak», ez, ordea, 
«sarrera-irteerak» edo «sartu-irtenak».

Argudio sendoren bat nahi nuke entzun, [sartu-irte(n)][erak] erabidearen 
aurka.


-- 
Gotzon Egia
gegia a bildua gipuzkoa.net
43º 19' 13.5" N 1º 57' 50.4" W



ItzuL posta zerrendari buruzko informazio gehiago