[itzul] Arraun etxe ala Arraun etxea?

[Xabier Armendaritz (Aixe, S. L.)]

Nire ustez aski arrazoi eman dira, «Arraunetxe» ondo sortua dela jotzeko 
(«Arraun etxea» ere zuzena litzatekeen bezala), eta gainera abantailak 
ikusten dizkiot. Bestek ondo argitu duten gai horretara, hala ere, bi 
albo argibide ekartzera nator.

1. Euskaltzaindiak gai horretan interesa baduen zerbait esana du 
aspalditxo, 1991. urtean (EGLU I, 29. orrialdea):

«Bestalde, baserri izenekin eta, Ekialdeko jokabidea eta Mendebalekoa
desberdina dela dirudi gaurregun behintzat. Hain zuzen, Ekialdean baserri
izenekin herri izenekin bezala jokatzen dute. Adibidez, baserri baten izena
Haranburua izango da, baina -a hori mugatzailetzat hartzen delarik,
Haranburutik, Haranburura, Haranburuan, e.a. esango dute.

»Mendebaleko joera, berriz, alderantzizkoa dela dirudi. Alegia, baserri 
baten
izena Kaminburu edo Etxeberri baldin bada Kaminburuko, Kaminburun,
Etxeberrin eta abar esango da. Beraz, zail gertatzen da erregela 
zehatzik ematea
gai honetan. Dena den, Ekialdean ere, Haranburua bada ere baserriaren izena,
baserri horretako gizona ez dajadanik Haranburua izango, Haranburu baizik.»

Beraz, mendebaldeko joera (Oriokoa ere bai) toponimoa «-a» mugatzailea 
gabe jartzea bide da.


2. Hari honetan bertan irakurri dugu esaldi hau: «Gure herriko Kultura 
etxearen izena "Portalea" da baina inori ez zaio okurritzen "Portaleako" 
egiterik, berba hori, berez, arrunta delako». Horren berri izatean, 
biziki poztu naiz, Eibar aldean Gasteizen baino txukunago dabiltzalakoan 
(begietako mina ematen baitit «Mendizorrotzako», «Salburuako», 
«Lakuabizkarrako» eta abar ikusteak... eta «Lakuako» kasuarekin 
dagoeneko etsia naiz, salbuespentzat hartuta).

Interneten begiratuta, ordea, errealitate gordina: «Portaleako 
liburutegia» handik, «Portaleako erakusketa» hemendik, «Portaleako areto 
nagusian» hortik... Eibarren ere txakurrak oinutsik. Googlek 965 
emaitza, «"Portaleako"» bilatuta (komatxo artean, zehazki forma hori 
besterik ager ez dadin):

https://www.google.es/search?q=%22portaleako%22&ie=utf-8&oe=utf-8&aq=t

Itxaropenerako, «"Portaleko" + Eibar» bilaketak 7.100 emaitza:

https://www.google.es/search?q=%22portaleko%22&btnG=Search&oe=utf-8


Ondo izan,

Xabier

_________________________

Xabier Armendaritz
AIXE itzulpen eta zerbitzuak
Biltzar Nagusiak, 11, behea
01010 GASTEIZ

Tel.: 945 174 476