[itzul] Arraun etxe ala Arraun etxea?

[Diez de Ultzurrun]

Egun on denoi.

Hizpide honen karietarat, gogora etorri zait badela zenbait euskal herritan bitasun halako bat txikitatik sumatzen hasi nintzena.
Kontua da ezen parienteren batzuen etxera joanda (mezetak zirela medio, konparazio), gaztelaniaz galdetuz gero ea nola zuen izena bere etxeak, gaztelaniaz erantzuten zutela: "Azpikoetxea" (egiazko kasu bat da). Geroxeago, ordea, euskaraz ari ginelarik, solasaren joanean beste aldaera bat ateratzen zitzaien edo ematen zuten: "Azpikotx".

Erronkaribarren, oker ez banago, badira beste etxe izen batzuk, akaso atal horretan eman litezkeenak: Galotx(edo), Petrotx, Salbotx (badakit arrisku handia dudala burruntzalia sartzeko, buruz ari naizelako).

Beraz, izen berezi gisa erabiltzekotan, uste dut, usadio zaharrera bederen, ez dela beharrezkoa mugatzailea.


________________________________
Nork: i-iturain a bildua ej-gv.es [mailto:i-iturain a bildua ej-gv.es]
Bidaltze-data: lunes, 11 de febrero de 2013 9:03
Nori: itzul a bildua postaria.com
Gaia: Re: [itzul] Arraun etxe ala Arraun etxea?

Ni Jose Mari Berasategirekin nago: ARRAUNETXEren alde. Bigarren partean ez naiz sartuko, letra larri eta xeheen kontu horretan.
Baina, aukeran, uste dut kasu honetan hobe dela, hobe dugula, ARRAUNETXEren alde egitea, bukaerako -a hori gabe.

Jabier Zabaletak aipatzen zuen arriskua dagoela jendea Arraun Etxeako ontziak eta horrelakoak esaten hasteko.
Eta norbaitek erantzun zion ez zela egokia balizko arriskuak aipatzen hastea, orain erabaki bat hartzeko.
Arriskuaren balizkotasunaz nik badut gauzatxo bat esateko. Orioko futbol taldeak izen horixe du: Orioko Futbol Taldea (O.F.T.).
Ezetz asmatu Orioko jendeak kalean nola izendatzen duen herriko ekipoa!
Ba, hara, erdaraz ari direnean: el Orioko tiene partido mañana.
Eta, euskaraz ari direnean..., Oriokok bihar partidua du.
Horrelaxe esaten dute. Azkenerako, etsi eta neu ere horrela esaten hastekoa naiz, bestela inork ez dik ulertuko eta pentsatuko dute arraunaz ari naizela.
Futbolean: el Orioko eta Oriokok. Jokalariak animatzeko ere, halaxe esaten zaie harmailetatik: Aupa Orioko!
Futbol zaleek hasieratik bertatik idatzita ikusi zutena, huraxe nagusitu zen eguneroko erabileran. Besterik gabe.

Hortaz, oraingo kasuan, hainbat arrazoirengatik: arrisku hori saihestuko litzatekeelako, zilegi delako, zuzena delako eta, nire ustez, politagoa eta egokiagoa delako: ARRAUNETXE.
Gainera, inguruan baditugu adibideak horrelako jokaerarenak. Herrian bertan: Goikokale, Etxeluze, Errotaetxe.
Eta urruti gabe, Usurbilen, hortxe daukagu orain golak sartzen dabilen Agirretxe.

Ni honen alde:
ARRAUNETXE
arraunketako eta piraguismoko teknifikazio zentroa

Iñaki Iturain
________________________________
Nork: Joxe Mari Berasategi [mailto:jxmbera a bildua euskaltel.net]
Bidaltze-data: sábado, 09 de febrero de 2013 13:55
Nori: ItzuL
Gaia: Re: [itzul] Arraun etxe ala Arraun etxea?

Nik, ordea, hasierakoari eusten diot: 'ARRAUNETXE' (izen berezia behar bada).

Uste dut halakoaren bila idatzi duela Jabier Zabaletak, bere bi mezuetan ('Ibaiertz' adibidea jarri du).
Patxi Petrirenak ere, (a-dun eta a gabeko aukeretan) lotuta eman ditu adibide guztiak, izen berezi gisa.

Nire ustez, izen berezia bada, lotuta. Horrelakoek, askotan, bigarren izen deskriptibo bat behar izaten dute:

ARABARRI
Arabako Kultura Ondare Eraikia Kudeatzeko Sozietate Anonimoa
Sociedad Anónima de Gestión del Patrimonio Cultural Edificado de Álava

ARTIUM
Arte Garaikidearen Euskal Zentro-museoa
Centro Museo Vasco de Arte Contemporáneo

Bestelakoak dira izen 'itzulgarriak', Anoetako 'Kirol Etxea' bezalakoak, (errotulua euskara hutsean jarri arren).
Antzeko zerbait dago Gasteizko Zerkabarren kalean, Arabako federazioen etxea denean.
Eta haren izena da 'Kirol Etxea', euskaraz, eta 'Casa del Deporte', gaztelaniaz.

Donostiakoaren webgunea begiratuta, euskaraz eusten zaio 'Kirol Etxea' banatuari, baina gaztelaniaz, izen bereziranzko trataera-bidean sartuak dira: bi aldiz agertzen da 'Kiroletxea', lotuta.

<<Kirol Etxeari buruz definizio hau eman liteke. Kirolaren tokia eta kirolerako tokia da; Gipuzkoako kirol federazioak hartutako gune bat da, aholkuak eskatzen dituzten klubei aholkularitza eskaintzekoa.
-------------- hurrengo zatia --------------
Erantsitako HTML dokumentu bat ezabatu egin da...
URL: <https://postaria.com/pipermail/itzul/attachments/20130211/ab7b8f96/attachment.html>