[itzul] ordinala non jarri sari, lehiaketa, txapelketa eta antzekoetan

[Joxe Mari Berasategi]

Aupa, Alfontso eta besteok,

Ondo ulertu badizut, zure pauso logikoei jarraikiz, aitortzen duzu "XV. 
Ernestina Champourcin poesia-lehiaketa" dagokiola, nik jarri nituen 
aukeren artean laugarrena, hain zuzen: 4. XXV. ERNESTINA CHAMPOURCIN 
POESIA LEHIAKETA.

Ordea, gero diozu, 'izeneko' elidituari helduta, /erraz ateratzen dela/ 
Asierren aukera: "Ernestina Champourcin  XV. poesia-lehiaketa".

Hortaz, aposizio baten erdian sar liteke ordinala?
Izen berezi-arrunt aposizioan, izen berezia edo arrunta (edo biak) 
konplexua(k) izateak aldatzen du aposizioa egiteko modua?

Egia da multzo soil samarrekin errazago argitzen direla gauzak, baina 
hori bezain egia da buruko minik handienak multzo konplexuek ematen 
dizkigutela. Azpian 'edizio' dagoela ere esan du Asierrek. Ez da 
harritzekoa. Gaztelaniaz ere, guri iristen zaizkigunetan behintzat, 
askotan sartzen dute 'edición' hitza luze eta konplexutzat jotzen 
dituzten kasuak 'goxatzeko-edo'. Areago, eta gauzak gehiago 
korapilatzeko, batzuetan, sintagmaburu soil bat jarri ordez, bi jarriko 
dizkizute:
  XIX *CERTAMEN* PROVINCIAL "*TROFEO* SAN ANTOLÍN"

Bestalde, nik Champourcin-ena (aposizioko izen bereziduna) 
itzulplazaratu baino lehen, Gotzon informazioak multzokatzeko moldeez 
aritu zitzaigun, labur, baina adibide polita utzi zigun izen konplexuez 
jarduteko: «10. campeonato escolar infantil y cadete femenino de futbol 
sala».
Ordinala du, eta gainera 'campeonato' sintagma burua 'ondotxo hornituta' 
datorkigu. Nola egin aurre hainbeste osagairi eta, batez ere, nola ordenatu?

Hona nire ariketatxoa, Gotzonek berea bota ahala egina, oraindik ere 
inori gaiarekin segitzeko gogorik geratu bazaio:

*1 izen egokiena finkatu, ordinala alde batera utzita*

CAMPEONATO ESCOLAR INFANTIL Y CADETE FEMENINO DE FUTBOL SALA

Demagun, disekzioa modu desberdinetan eginda eta elementuen hurrenkera 
eta lotura aukerak aztertuta, hau pentsatu dugula:

HAUR ETA KADETE MAILAKO NESKEN ARETO FUTBOLEKO ESKOLARTEKO TXAPELKETA

*2 kokatu ordinala*

Asierrek ez luke zalantzarik:

HAUR ETA KADETE MAILAKO NESKEN ARETO FUTBOLEKO ESKOLARTEKO I. TXAPELKETA

Egigun proba ordinala hasieran jarrita:

I. HAUR ETA KADETE MAILAKO NESKEN ARETO FUTBOLEKO ESKOLARTEKO TXAPELKETA

Gotzonen 2. moduan begiratuta, gelditu egingo ginateke multzo 
hauetakoren bat irakurtzen amaitzean?

[I. HAUR]

[I. HAUR ETA KADETE]

[I. HAUR ETA KADETE MAILAKO]

[I. HAUR ETA KADETE MAILAKO NESKEN]

[I. HAUR ETA KADETE MAILAKO NESKEN ARETO FUTBOLEKO]

[I. HAUR ETA KADETE MAILAKO NESKEN ARETO FUTBOLEKO ESKOLARTEKO]

ala hasi eta segi egingo genuke, bizi-bizi, sintagmaburura iritsi arte?

*I. *HAUR ETA KADETE MAILAKO NESKEN ARETO FUTBOLEKO ESKOLARTEKO *TXAPELKETA*

Eta joko bagenu, baliatuz euskarak hartarako ematen digun aukera aparta, 
informazio zama astazaran bietan orekatzera, sintagmaburuaren ezker-eskuin?

*I.* ESKOLARTEKO ARETO-FUTBOL *TXAPELKETA*, HAUR ETA KADETE MAILAKO NESKENA

Eta koma-tranparik gabe?

*I.* ESKOLARTEKO ARETO-FUTBOL *TXAPELKETA* HAUR ETA KADETE MAILAKO NESKENA

Galdera askotxo, aukeran, baina ...

Xabierrek ere sinestu zuen, noizbait, jakintsuagotzen gaituen zalantza 
orokorraren baitan.


Honaino iritsi bazara, itzulkide, ez duzu meritu makala!

Joxe Mari Berasategi
Gasteiz




-------------- hurrengo zatia --------------
Erantsitako HTML dokumentu bat ezabatu egin da...
URL: <https://postaria.com/pipermail/itzul/attachments/20140215/cd419895/attachment.html>