[itzul] ER: altua/handia

[Aixe, S.L.]

>Hau da, nire iritziz, tenperatura altua baietz baina tenperatura garaia
>edo tenperatura gora ezetz, ezinezkoa dela, esaten badugu, orduan
>aitortu behar dugu ez gabiltzala irudia edo irudikapena euskaraz egiten.
>Erdararen prozesuen emaitzak besterik gabe mailegatzen baizik.

Nik uste baietz, irudia geureganatu egin dugula, Juanek azaldu duen eran. 
Barra-barra erabiltzen ditugu honelakoak:

    - Gora egin dute interesek.
    - Jaitsi egin da legatzaren prezioa.
    - Beheranzko joera dute tenperaturek.

Beraz, euskara txukunean «prezio garaiak», «tenperatura apalak» eta abar 
erabiltzeko eragozpenik ez dut ikusten. Eta Interneten bilatuz gero, aurkitu 
ere aurkituko ditugu, bat-batean bururatu zaizkidan bi horiek behinik behin.

Belarrira oso gaizki ematen didate, hala ere, «maila altuko/baxuko 
aldizkaria» moduko esamoldeek, Patxi Petrirenak ederki esan duenez. Azken 
batean (barreneko senak eragindako debekua esplikatze aldera, geroztik egin 
dudan arrazoibidea), eskailera batean maila guztiak garaiera bertsukoak 
izaten dira; eskuarki, ez da bat besteak baino nabarmen altuagoa edo 
baxuagoa izaten. Irudi hori erabiliz gero, maila bakoitza gorago edo 
beherago egongo da; ez da altuagoa edo baxuagoa izango. Beraz, senak honela 
jokatzea eskatzen dit:

    - goi/behe mailako aldizkaria
    - aldizkari hori harako hura baino goragoko/beheragoko mailakoa da
    - ...

Ondo izan,

Xabier

___________

Xabier Armendaritz
AIXE itzulpen eta zerbitzuak
Gasteiz hiribidea, 89, atzealdea
01009 GASTEIZ

Tel.: (+34) 656 703 313
<aixe a bildua aixe.net
<aixe a bildua ctv.es